नेपाल जेसीज केन्द्रीय सचिवालयले जनवरी २, २०२६ मा जारी गरेको पत्र (प.सं. NJC-SG01-SG-LOM 01/26) मार्फत माडी जेसीजका सम्पूर्ण गतिविधि अर्को सूचना नभएसम्म स्थगित गर्न निर्देशन दिएको थियो। उक्त निर्देशन शाखाको कानुनी हैसियत र संस्थागत मर्यादा जोगाउनका लागि गरिएको दाबी गरिएको छ।

तर, सो निर्देशनलाई बेवास्ता गर्दै फेब्रुअरी १२ मा पदस्थापन कार्यक्रम गर्ने तयारी भएको भन्दै माडी जेसीज सचिवालयले कडा आपत्ति जनाएको छ। सचिवालयका अनुसार केन्द्रको रोक रहेको अवस्थामा गरिने कुनै पनि कार्यक्रमलाई संस्थागत मान्यता नदिइने र त्यस्ता कार्यक्रमबाट चयन वा घोषणा गरिएका पदाधिकारीलाई नचिनिने स्पष्ट पारिएको छ।

सचिवालयले समानान्तर गतिविधि सञ्चालन गरी संस्थालाई विखण्डनतर्फ लैजान खोज्ने जो–कोहीमाथि कडा अनुशासनात्मक कारबाहीका लागि केन्द्रमा सिफारिस गरिने चेतावनी दिएको छ। आवश्यक परे साधारण सदस्यबाट समेत निष्कासनसम्मको कदम चाल्न सकिने उल्लेख गरिएको छ।

यसैबीच, स्थानीय प्रशासन, सुरक्षा निकाय तथा कार्यक्रम स्थल उपलब्ध गराउने पक्षलाई समेत विवादित कार्यक्रममा सहयोग नगर्न अनुरोध गरिएको छ। सम्भावित झडप वा अप्रिय घटनाको जिम्मेवारी आयोजक पक्ष स्वयंले व्यहोर्नुपर्ने चेतावनीसमेत दिइएको छ।

माडी जेसीज सचिवालयले सम्पूर्ण सदस्य, पूर्व अध्यक्ष तथा नागरिक समाजलाई अवैधानिक र भ्रमपूर्ण गतिविधिबाट टाढा रहन आग्रह गरेको छ। संस्थाको विधान, मूल्य–मान्यता र अनुशासन जोगाउन आफूहरू अन्तिमसम्म दृढ रहने जनाएको छ।